Höfði er undan Hraunu Orradóttur og hinum magnaða Korgi frá Ingólfshvoli sem Artemisia Bertus hefur gert garðinn frægan með. Korgur er magnaður gæðingur með jafnar og góðar gangtegundir. Hesturinn er sýndur án skeiðs en í kynbótadómi er hann með 9,5 fyrir fegurð í reið og hægt stökk; 9 fyrir aðra þætti. Þá er byggingin einnig góð, hálsinn langur og mjúkur, léttbyggður með góðan prúðleika og hófa.

Korgur hefur undanfarin ár sannað sig sem frábær íþróttahestur í fjórgangi og tölti. Varð hann Íslandsmeistari í fjórgangi 2017 áður en hann hélt utan á heimsmeistaramótið í Oirschot í Hollandi 2017 þar sem hann varð í 4. sæti í sömu grein.  Hér til hliðar má sjá skemmtilegt myndband af Korgi tekið sumarið 2016.

Fyrstu afkvæmi Korgs eru farin að koma fram og þegar þetta er skrifað þá eru tvö af þremur sýnd með fyrstu verðlaun, þar af einn heimsmeistari í 5 vetra flokki á nýafstöðnu heimsmeistaramóti; Grani frá Torfunesi (8.58).

Höfði er af öflugum skagfirskum ættum, en móðir Korgs, Korga frá Ingólfshvoli, var undan hálfsystkynum undan Ófeigi frá Flugumýri, Geysi og Golu frá Gerðum. Faðir Korgs, Leiknir frá Vakursstöðum er síðan undan Safír frá Viðvík, Hrafnssyni og Lyftingu frá Ysta-Mó Hervarsdóttur. Faðir Hraunu er síðan Orri frá Þúfu Oturssonur og móðir Hraunu, Urð frá Hvassafelli, er út af Hraunari frá Sauðárkróki Ófeigssyni sem fórst ungur en skilaði afburða hrossum þó fá hafi verið.

Höfða svipar mikið til Korgs hvað byggingu varðar; prúður með langan bogadreginn háls, miklar herðar, léttbyggður og með öfluga fætur. Höfði var frumtaminn í 3 mánuði vorið 2018 og kom strax í tölt þegar leitað var eftir því. Veturinn 2018-2019 verður hann í tamningu og verður spennandi að sjá hvernig hann verður undir vorið.

Hér að neðan eru nokkrar myndir af Höfða sem hægt er að skoða í stærri upplausn með því að klikka á myndirnar.